അനുശോചനം

പ്രശസ്ത കലാകാരനും സാംസ്കാരിക പ്രവർത്തകനുമായ സൂര്യകൃഷ്ണമൂർത്തിയുടെ നിര്യാണത്തിൽ ഗവർണർ രാജേന്ദ്ര വിശ്വനാഥ് ആർലേക്കർ അഗാധമായ ദുഃഖം രേഖപ്പെടുത്തി.

സംഗീതം, നൃത്തം, നാടകം തുടങ്ങി കലയുടെ വിവിധ മേഖലകളെ ഒരേ വേദിയിൽ അണിനിരത്തി കേരളത്തിന്റെ സാംസ്കാരിക ജീവിതത്തിന് പുതിയ ദിശ നൽകിയ വ്യക്തിത്വമായിരുന്നു സൂര്യകൃഷ്ണമൂർത്തി. സൂര്യ ഫെസ്റ്റിവലിലൂടെ ദേശീയവും അന്തർദേശീയവുമായ നിരവധി കലാകാരന്മാരെ കേരളത്തിന്റെ സാംസ്കാരിക വേദിയിലേക്ക് കൊണ്ടുവന്ന അദ്ദേഹത്തിന്റെ സംഭാവനകൾ എന്നും ഓർമിക്കപ്പെടും.

കലാകാരന്മാരെ പ്രോത്സാഹിപ്പിക്കുന്നതിലും പുതിയ പ്രതിഭകൾക്ക് അവസരങ്ങൾ ഒരുക്കുന്നതിലും അദ്ദേഹം പുലർത്തിയ ആത്മാർത്ഥതയും സമർപ്പണവും മാതൃകാപരമായിരുന്നു. കലയും സംസ്കാരവും മനുഷ്യരെ തമ്മിൽ ബന്ധിപ്പിക്കുന്ന ശക്തിയാണെന്ന വിശ്വാസത്തോടെ ജീവിതം സമർപ്പിച്ച മഹത്തായ സാംസ്കാരിക പ്രവർത്തകനെയാണ് അദ്ദേഹത്തിന്റെ വിയോഗത്തിലൂടെ കേരളത്തിന് നഷ്ടമായത്.

സൂര്യകൃഷ്ണമൂർത്തിയുടെ വിയോഗം കേരളത്തിന്റെ സാംസ്കാരിക രംഗത്തിന് നികത്താനാവാത്ത നഷ്ടമാണ്. അദ്ദേഹത്തിന്റെ കുടുംബാംഗങ്ങളുടെയും സുഹൃത്തുക്കളുടെയും കലാസ്നേഹികളുടെയും ദുഃഖത്തിൽ പങ്കുചേരുന്നു.

*******